小薯深明呢個世界無奇不有，而且係一樣米養百樣人，但勢估唔到，竟然比佢遇上了奇人中的畸人。（按：小薯字體潦草，而且中文唔好，估計佢可能想講「奇人中的奇人」。）
他是誰？咪係班長囉！真係想唔比三個超級 good 佢都唔得。
話說上回班會才狠批小薯同大薯唔識寫字，點知今日班會上佢又無啦啦話：「寫大字同寫小字都唔係我專長，我都無咩可以貢獻，就由你兩個負責寫咗去啦，寫完唔駛交比我，呢啲簿我唔收，你哋直接交比班主任就可以嘞。」
*0*
小薯當然不及大薯般大方得體，即時忍唔住流露咗個O 咀表情，真係失禮街坊。與此同時，班長即自顧自的開始分配工作：「小薯你負責寫大字，大薯就負責寫小字，我就負責劃公仔；不過小薯你記得話我知劃咩公仔。」
這時，小薯還未收回 O 咀表情，當然就來不及比反應，但刹那之間，班會就完結了。
晚上，小薯輾轉反側，痛恨自己個咀 O 咗咁耐，唔識即時提出疑問：班長咁叻，點解話自己無嘢可以貢獻？班長呢頭話我哋唔識字，嗰頭又叫我哋自己做功課，仲要話埋比佢知寫咗咩字，好矛盾咁喎？點解佢唔需要負責檢查吓我哋啲功課？話得比佢知啲公仔點畫，係咪代表佢會負責晒畫公仔部分？還是佢只係會決定畫咩同點畫，但就要我哋畫埋上埋顏色呢？
如此胡思亂想、甚覺被人搵笨的小薯，這夜，失眠了。
1 則留言:
致可憐的大薯及小薯同學:
開課才一周, 老師就給你們假期一樣的功課, 但卻冇假期咁耐時間俾你地做, 我猜他實在真係有苦衷的:
一.你選修的科目一早就定為特別班, 加上更是精英班, 因此為了校譽一定要谷到盡, 不容鬆懈.
二.班主任既是高薪厚禮請回來任教幾年, 還專門為你兩個作個別教授, 理應高興才是. 因此功課一定會比其他人多.(按:班長是高人, 可能是留班生, 或是名校轉來的插班生, 所以不用上課, 也不用做功課.)
三.這個學期特別短, 期中試及期考的時間都很貼近, 為補你們有十A, 所以一定不容有失.
四.班長身份特殊, 因此可以不必靠考試的成績就可以順利升班, 而你們還要靠平時分加考試分來升班, 故平時的功課實在不能少.
五.君不見開學幾天, 全港的中小學都開始一面收暑期作業, 一面派工作紙, 務求達到家長滿意, 校長安心的地步, 好讓他們知道俾咁多錢搞精英班不是白讀的.
唉!無法啦!惟有以古人一句:『只要有恆心, 鐵柱磨成針!』來勸勉兩位. 繼續寫字啦!
一家長上
發佈留言