打冷震

這個冬天，好像特別冷，也特別長。

坐在家裡，穿著抓毛外套，仍覺冰冷，再加件薄羽絨，好一點，但間中還是會打個冷震，是由心震出來那一種，背脊仍覺陣陣涼意。指尖在鍵盤上拍打，噼啪作響，但無論動作如何迅速，也不能使體內熱血流得快一點，手指奇硬無比。

今日，終於忍唔住問：「係咪要買翻部暖風機？」話雖如此，但無論是電視新聞，或是身邊的人，都告訴我：冇晒貨啦，訂都要等多幾日。其實，堅持到今天，是不忍家中又再多添一件年中只用數天、放多過用的電器。回想當年結婚，朋友送禮，我就要了榨汁機啦，攪拌機啦，電水壺啦......結果，有些只用了幾次，便一直藏在廚櫃內，有些更索性轉贈親友，最經典者莫過於那個電鍋，用了一次，又成了收藏品，一藏幾年，最近才拿出來打邊爐用。雖然近年購物慾大大收歛，但只消在屋內繞場一週，仍會發現自己擁有的總比實際需要的來得多。

既然捱到今日，既然預訂了還要等多天，既然天文台話暫時估計只會凍多兩星期，那，我還是再忍耐一下吧，如經上記著說：「忍耐到底，必然得救。」只要熬得過這兩星期冇凍死，都應該有得救了！